ਸ਼ਬਦ ਸਾਂਝ ਦੇ ਦੋ ਵਰ੍ਹੇ

ਅਜ ਸ਼ਬਦ ਸਾਂਝ ਦੀ ਦੂਜੀ ਵਰ੍ਹੇਗੰਢ ਮੌਕੇ ਜਦੋਂ ਵਧਾਈਆਂ ਦੇਣ ਲਈ ਕਲਮ ਚੁੱਕੀ ਤਾਂ ਵਧਾਈਆਂ ਨਾਲੋਂ ਵੱਧ ਪਰਦੇ ਦੇ ਪਿਛਲੀ ਕਹਾਣੀ ਸ਼ਬਦ ਸਾਂਝ ਦੇ ਪਾਠਕਾਂ ਨਾਲ ਸਾਂਝੀ ਕਰਨੀ ਨੂੰ ਦਿਲ ਕੀਤਾ। ਅਜ ਤੋਂ ਦੋ ਕੇ ਵਰ੍ਹੇ ਪਹਿਲਾਂ ਰਿਸ਼ੀ ਨੇ ਅਣਗੋਲੀਆਂ ਤੇ ਖ਼ੂਬਸੂਰਤ ਕਲਮਾਂ ਜੋ ਕਿ ਭੀੜ ਵਿੱਚ ਕਿਸੇ ਨੂੰ ਦਿਖਾਈ ਨਹੀਂ ਦੇ ਰਹੀਆਂ ਸਨ, ਨੂੰ ਦੁਨੀਆਂ ਸਾਹਮਣੇ ਲਿਆਉਣ ਦੀ ਭਾਵਨਾ ਨਾਲ ਇਹ ਬਲੋਗ ਸ਼ੁਰੂ ਕੀਤਾ ਸੀ। ਪਰ ਕਹਿੰਦੇ ਹਨ ਕਿ ਸੱਚੇ ਦਿਲ ਨਾਲ ਕੀਤੀ ਮਿਹਨਤ ਸਦਾ ਹੀ ਰੰਗ ਲਿਆਉਂਦੀ ਹੈ ਤੇ ਅਜ ਇਹ ਹੀ ਸਾਬਤ ਹੋ ਗਿਆ ਹੈ।ਅਜ ਇਹ ਬਲੋਗ ਦੁਨੀਆਂ ਭਰ ਵਿੱਚ ਪੜ੍ਹਿਆ ਜਾਂਦਾ ਹੈ ਤੇ ਕਹਿੰਦੀਆਂ-ਕਹਾਉਂਦੀਆਂ ਕਲਮਾਂ ਇਸ ਬਲੋਗ ਤੇ ਛਪਣ ਚ ਮਾਣ ਮਹਿਸੂਸ ਕਰਦਿਆਂ ਹਨ।

ਪਰ ਜਿਸ ਗਲ ਨੇ ਮੈਨੂੰ ਪ੍ਰਭਾਵਿਤ ਕੀਤਾ ਉਹ ਇਹ ਹੈ ਕਿ ਪਿਛਲੇ ਦੋ ਵਰ੍ਹਿਆਂ ਤੋਂ ਰਿਸ਼ੀ ਜ਼ਿੰਦਗੀ ਦੇ ਇਕ ਇਹੋ ਜਿਹੇ ਪੜਾਅ ਚੋਂ ਗੁਜਰ ਰਿਹਾ ਹੈ, ਜਿਸ ਵਿੱਚ ਰੋਜੀ-ਰੋਟੀ ਦੇ ਲਾਲਿਆਂ ਦੇ ਨਾਲ ਨਾਲ ਭਵਿੱਖ ਬਾਰੇ ਚਿੰਤਨ ਤੋਂ ਬਾਹਰ ਨਿਕਲ ਕੇ ਸੋਚਣਾ ਨਾ ਮੁਮਕਿਨ ਹੁੰਦਾ ਹੈ। ਦੋ ਕੁ ਵਰ੍ਹੇ ਪਹਿਲਾਂ ਰਿਸ਼ੀ ਨੇ ਪੰਜਾਬ ਵਿੱਚ ਆਪਣਾ ਚਲਿਆ-ਚਲਾਇਆ ਬਿਜਨੈੱਸ ਛੱਡ ਕੇ ਆਪਣੇ ਤੇ ਆਪਣਿਆਂ ਬੱਚਿਆਂ ਦੇ ਚੰਗੇ ਭਵਿੱਖ ਲਈ ਆਸਟ੍ਰੇਲੀਆ ਨੂੰ ਆਪਣੀ ਕਰਮ ਭੂਮੀ ਚੁਣਿਆ ਸੀ। ਉਸ ਫ਼ੈਸਲੇ ਨੂੰ ਭਾਵੇਂ ਹਾਲੇ ਤਕ ਰਿਸ਼ੀ ਸਮਝ ਨਹੀਂ ਸਕਿਆ ਕਿ ਇਹ ਫ਼ੈਸਲਾ ਸਹੀ ਸੀ ਜਾਂ ਗ਼ਲਤ? ਪਰ ਇਹੋ ਜਿਹੀਆਂ ਹਾਲਾਤਾਂ ਵਿੱਚ ਜੇ ਕੋਈ ਬੰਦਾ ਸਾਹਿਤ ਅਤੇ ਮਾਂ ਬੋਲੀ ਲਈ ਇੰਨਾ ਵਕਤ ਕੱਢਦਾ ਹੈ ਤਾਂ ਇਹੋ ਜਿਹੇ ਬੰਦੇ ਦੀ ਸਿਰੜ ਨੂੰ ਸਲਾਮ ਕਰਨਾ ਬਣਦਾ ਹੈ।

ਮਿੰਟੂ ਬਰਾੜ    

ਸਦੀਆਂ ਪੁਰਾਣਾ ਇਤਿਹਾਸ ਗਵਾਹ ਹੈ ਕਿ ਪੰਜਾਬ ਇੱਕ ਵਿਸ਼ਾਲ ਸੂਬਾ ਸੀ । ਸੰਨ 1947 ਵਿਚ ਇਸ ਦੇ ਦੋ ਟੋਟੇ ਹੋ ਗਏ । ਆਜ਼ਾਦੀ ਤੋਂ ਕੁਝ ਕੁ ਵਰ੍ਹਿਆਂ ਬਾਅਦ ਲਹਿੰਦੇ ਪੰਜਾਬ ਦੀ ਧਰਤੀ ਉੱਪਰ ਵੰਡ ਦੀਆਂ ਰੇਖਾਵਾਂ ਖਿੱਚ ਕੇ ਇਸ ਦੇ ਕਈ ਟੁਕੜੇ ਹੋਰ ਸੂਬਿਆਂ ਦੇ ਹਵਾਲੇ ਕਰ ਦਿੱਤੇ । ਅੱਜ ਦੁਨੀਆਂ ਦੇ ਨਕਸ਼ੇ ਉੱਪਰ ਪੰਜਾਬ ਦਾ ਭਗੌਲਿਕ ਆਕਾਰ ਬੇਸ਼ਕ ਬਹੁਤ ਬਹੁਤ ਛੋਟਾ ਹੈ, ਪਰ ਪੰਜਾਬੀ ਮਾਂ ਬੋਲੀ ਨੂੰ ਪਿਆਰ ਕਰਨ ਵਾਲਿਆਂ ਨੇ ਇਸ ਛੋਟੇ ਜਿਹੇ ਪੰਜਾਬ ਦੀਆਂ ਹੱਦਾਂ ਨੂੰ ਪੂਰੀ ਦੁਨੀਆਂ ਵਿੱਚ ਫੈਲਾ ਦਿੱਤਾ ਹੈ । ਪ੍ਰਦੇਸਾਂ ਵਿੱਚ ਵਸਦੇ ਪੰਜਾਬੀਆਂ ਨੇ ਆਪਣੀ ਮਾਂ ਬੋਲੀ ਨਾਲ ਰੱਜ ਕੇ ਮੋਹ ਪਾਲਿਆ । ਆਪਣੀਆਂ ਸਾਹਿਤਕ ਸਰਗਰਮੀਆਂ ਰਾਹੀਂ ਦੁਨੀਆਂ ਦੇ ਹਰ ਦੇਸ਼ ਨੂੰ ਆਪਣੀ ਬੁੱਕਲ 'ਚ ਲੈ ਲਿਆ । ਰੇਡੀਓ, ਟੈਲੀਵੀਜ਼ਨ ਅਤੇ ਅਖਬਾਰਾਂ ਰਾਹੀਂ ਦੇ ਮਾਧਿਅਮ ਰਾਹੀਂ ਪੰਜਾਬੀ ਨੂੰ ਇੱਕ ਨਵੀਂ ਰੂਹ ਦਿੱਤੀ । 

ਆਸਟ੍ਰੇਲੀਆ ਵਿੱਚ ਪੰਜਾਬੀ ਇੰਟਰਨੈੱਟ ਮੈਗਜ਼ੀਨ ਸ਼ਬਦ ਸਾਂਝ ਵੀ ਇਸ ਲੜੀ ਦਾ ਇੱਕ ਵਿਸ਼ੇਸ਼ ਹਿੱਸਾ ਹੈ । ਪੰਜਾਬੀ ਲਿਖਾਰੀ ਰਿਸ਼ੀ ਗੁਲਾਟੀ ਦੁਆਰਾ ਚਲਾਇਆ ਜਾ ਰਿਹਾ ਇਹ ਇੰਟਰਨੈੱਟ ਮੈਗਜ਼ੀਨ ਪੰਜਾਬੀਅਤ ਦਾ ਮਾਣ ਹੈ । ਰਿਸ਼ੀ ਹੋਰਾਂ ਦੀ ਮਿਹਨਤ ਅਤੇ ਲਗਨ ਸਦਕਾ ਇਹ ਮੈਗਜ਼ੀਨ ਅੱਜ ਦੋ ਸਾਲ ਪੂਰੇ ਕਰ ਚੁੱਕਾ ਹੈ । ਸੋ, ਇਸ ਮੁਬਾਰਕ ਮੌਕੇ 'ਤੇ ਰਿਸ਼ੀ ਵਧਾਈ ਦਾ ਹੱਕਦਾਰ ਹੈ । ਪਿਛਲੇ ਦੋ ਸਾਲਾਂ ਦੌਰਾਨ ਜਿੱਥੇ ਸ਼ਬਦ ਸਾਂਝ ਨੇ ਨਾਮਵਰ ਹਸਤੀਆਂ ਦੀਆਂ ਰਚਨਾਵਾਂ ਛਾਪ ਕੇ ਫਖ਼ਰ ਮਹਿਸੂਸ ਕੀਤਾ ਹੈ, ਉੱਥੇ ਹੀ ਨਵੇਂ ਉੱਭਰ ਰਹੇ ਲਿਖਾਰੀਆਂ ਨੂੰ ਹੱਲਾਸ਼ੇਰੀ ਵੀ ਦਿੱਤੀ ਹੈ । ਸੋ, ਸ਼ਬਦ ਸਾਂਝ ਦੀ ਇਸ ਵਧੀਆ ਕਾਰਗੁਜ਼ਾਰੀ ਲਈ ਆਓ ਮਿਲ ਕੇ ਮੁਬਾਰਕਬਾਦ ਦੇਈਏ ਤਾਂ ਕਿ ਅੱਗੇ ਹੋਰ ਮਾਂ ਬੋਲੀ ਦੀ ਡੱਟ ਕੇ ਪਹਿਰੇਦਾਰੀ ਕਰ ਸਕੇ...